रुकुम। राष्ट्रिय स्वतन्त्र पार्टी (रास्वापा)ले रुकुमका सबै वडाहरूमा संगठन विस्तारको अभियान तीव्र पारेको छ। पार्टीले स्थानीय तहमा स्थायी संरचना निर्माण, नेतृत्व छनोट तथा सदस्यता अभिवृद्धि अभियानलाई प्राथमिकतासाथ अघि बढाएको जनाएको छ।

पार्टीका जिल्ला स्तरीय नेतृत्वका अनुसार पछिल्लो समय रुकुममा रास्वापातर्फ जनसञ्जाल बढिरहेको हुँदा प्रत्येक वडामा पार्टीको पहुँच विस्तार गर्ने उद्देश्यले श्रृंखलाबद्ध रूपमा संगठन विस्तारको काम थालिएको हो।

रास्वापाका स्थानीय संयोजकहरूले गाउँगाउँमा वडास्तरीय भेला, स्थानीय सरोकारका विषयमा छलफल र नयाँ सदस्यता अभियन सञ्चालन गर्दै आएका छन्। पार्टीका अनुसार, स्थानीय नागरिकसँग प्रत्यक्ष संवाद, समस्या पहिचान र समाधान सुझाव संकलनमार्फत “तल्लो तहसम्म प्रभावकारी उपस्थिति” सुनिश्चित गरिनेछ।

जिल्लाका दुर्गम र भौगोलिक रूपमा चुनौतीपूर्ण वडाहरूमा पनि युवा स्वयंसेवी टोलीमार्फत संगठन विस्तारलाई प्रभावकारी बनाइएको बताइएको छ।पार्टीले निकट भविष्यमा वडा–टोलमा नीति–बहस, युवा परिचालन, सामाजिक उत्तरदायित्वका कार्यक्रम तथा स्थानीय जनताको प्राथमिकताका मुद्दामा अभियान सञ्चालन गर्ने तयारी गरेको छ।

रुकुममा रास्वापाको बढ्दो सक्रियतालाई स्थानीयले पनि चासोका साथ हेरिरहेको जनाइएको छ। पार्टीले संगठन विस्तारसँगै आगामी राजनीतिक गतिविधि तथा स्थानीय संरचनाको सुदृढीकरणलाई थप गति दिने बताएको छ।